Con tanti auguri a tutti i lettori di Milano Post
Bòna Pasqua, cara gent,
cont el coeur, in man gh’hoo nient,
voraria regalatt
on bèll oeuv de ciccolatt,
‘na colomba mandorlada
moresina e profumada;
ma son chì ‘me on presonee,
‘me on pollaster nel pollee.
Finirà poeu ‘sta bugada
de stà in cà… oeih che menada!
Hinn duu mes che sèmm saraa
presonee in di nòster cà.
“Tegnii dur e mollii nò!
Dai pazienza on poo ‘ncamò!”
Quèsta l’è la tiritera
che se sent mattina e sera.
Ma ‘sto virus malarbètt
brutt, schifos, ch’el nó desmètt
se po’ nò trall in del fòss?
Ghe l’hoo chì… ‘l me sta in sul gòss.
Sì el soo, son nò on poètta,
son nassuu a la Mojètta
soo de vèss on versiroeu,
dai, pazienza mè car fioeu
Dèss però, rivaa ‘l moment
che ve brasci-sù content
mi ve mandi tanti auguri
bèi, sincer, de coeur, v’el giuri!
Carletto Oblò
Milano Post è edito dalla Società Editoriale Nuova Milano Post S.r.l.s , con sede in via Giambellino, 60-20147 Milano.
C.F/P.IVA 9296810964 R.E.A. MI – 2081845